ملاحظين معي ؟؟

[المحفوظي]

السلام عليكم أعزائي الكرام
أخواني لاحظت شيء في هذا المنتدى يختلف نوعاً ما عن باقي المنتديات ، إن هناك من يقوم بوضع مناقشة بأسمه مخالفاً بذلك الاسلوب الأدبي في النقل للمقالات الأدبية ، فهو من الناحية الأدبية منبوذ تماماً بين القراء ومن الناحية الشرعية يعتبر سرقة ملك الغير فالمقال يعتبر ملك لمؤلفه وبالتالي أدبياً حين نقوم بنقل أي معلومة مهما صغرت فلا بد من تذييلها بكلمة منقول حتى نحفظ حق الغير ولا أحد يصير أديب زمانه على ظهور الغير .

أخواني لاحظت شيء في هذا المنتدى يختلف نوعاً ما عن باقي المنتديات ، أنه أي عضو أو عضوة يطرح مناقشة تكون الردود كالتالي
(لاهنت وبيض الله وجهك)
(يعطيك العافية)
(ووووووو)
بدون لا يكون هناك تعليق بالمدح أو النقد الهادف والبناء طبعاً أو بث روح الدعابة والنكته في المناقشة مع عدم الأساءة لصاحب المناقشة .

أخواني لاحظت شيء في هذا المنتدى يختلف نوعاً ما عن باقي المنتديات ، أن أي عضو كان أو عضو عندما يُعلق على مناقشته ويحب يشكر من علَقْ على يروح مخصص لك واحد صفحه له وحده ، ياحبيبي حاب تشكر من علق على مناقشتك أجمعهم كلهم بصفحة واحدة وكل واحد أشكره بنفس الصفحة ، يعني لما أشوف عدد التعليقات أشوفها عشرين ، لما أفتح المناقشة ألقى عشرة ردود من الأعضاء وعشرة ردود من صاحب المناقشة يشكر فيها من علق على مناقشته .

أخواني تكفون لا أحد يعلق على مناقشتي بقولة
طول الله أشدوقك
بيض الله عيونك
يعطيك بنت الحلال اللي تقطر الشب بعيونك

أبي منكم تعليق أما بصدق قولي هذا أو فيه نوع من الدعابة محنا قاعدين في مجلس رسمي خلو منا الرسميات .

أرجو منكم تقبلي بصدر رحب .
والخاتمه اللي بيحب النبي يستدني اللي بوزانه ويحب خشمه .

[فزاع]

المحفوظي حياك الله أول شي ويا رجال لو تهدي اللعب شوي بس وتاخذ نفس طوييييييييييييييييل :)
كلامك على العين والراس أخي المحفوظي ولكن أعتقد بانك عممت بعض ما رايته من مواضيع على جميع المواضيع أو أغلبها ويا أخي اذا حنا بنشكر أخ أو نطري عليه ترى مب لانه جاب كلام من عنده وبس تراه يشكر أيضا على نقله للموضوع وعلى ترتيبه له والدال على الخير كفاعله وإذا على الصفحات فهذا يا اما من اختلاف تواقيت الردود أو من باب احترام الشخص .
هذي وجهة نظري ونقدك بناء واذا كان فيه نقد وانتقاد يكون فيه تطور واذا لم يكن فالامور ستمشي كما هي أو يمكن ترجع للوراء فانت أخي المحفوظي تشكر على ترسانة الانتقاد هذي وبعد نقول لك بيض الله وجهك:) ولا هنت يالأجودي:) ولا تاخذ على خاطرك من كلمات الاثناء ويعطيك العافية:).

[ابومحمد الشامري]

لا هنت يا المحفوظي ولا احب ازيد على كلام اخوي فزاع الا انا اقول:

كثير من الناس ينتقدون هذه الكلمات لا هنت وبيض الله وجهك ، لماذا؟؟؟ بالعكس هذه الكلمات تتقرب بها لدى الاعضاء باسلوب طيب اما اذا دخلنا بقوة وكسرنا من مجاديف الاعضاء بالانتقادات والاسهابات التي تطول فهذا من باب التنفير.
يكون الرد على المواضيع على شقين ، الشق الاول : يكون لدى العضو خلفية عن الموضوع المطروح فلذلك تجده يسهب في الرد ، والشق الثاني ليس لديه خلفية عن الموضوع فيختصر الرد بالشكر والثناء ومن لا يشكر الناس لا يشكر الله.
فمثالا على ذلك قصيدة مطروحة لدى عضو من الاعضاء تعتقد ما هو الرد على هذه القصيدة يكون بصح لسانك يا السنافي ولسان الشاعر الفلاني فقط لا يزيد عن ذلك ولا ينقص.

ولا هنت اخي العزيز المحفوظي على هذه الاقتراحات الرائعة.

[المحفوظي]

الأخ فزاع
******
على شنهو أهدي ؟
ماني بمعصب ولازعلان بس متخم من العيشه
تعرف طال عمرك لا كثر الواحد من العيش على الغداء وش يبي له ؟
أكيد يبي له طويسة شنينه حتى تهضم مطّبعْ المراكب اللي طافح على الكبد .
حبيبي فزاع لاحظ مفردات مناقشتي
(نوعاً ما)
(وضع مناقشة بأسمه)
يعني ماعممت الشغله
ماني بوصيك إن كان الصميل اللي حدر بيت الدرج عاد فيه باقي شنينه ؟ دزلها لي على الخاص لعب فيني عيش الوزان .

الأخ أبو حمد الشامري
*************
لبا وله قلبك ...... كلامك على رأسي
العبارات اللي ذكرتها أنا ماأنتقدها بقدر ماأحب أن تكون حافه ومثلك عارف شلون طعم الخلاّصه بدون خلاّص الحساء ؟
أكيد مالها طعم.
يعني اللي أبي أوصل له أن لايكون التعليق رسمي حده ..... ياأخي خل فيه شيء من روح الدعابة .

على طاري الخلاّصه ..... ترى ذا الأيام حِل تخليص الزبد اللي عجوزه ولا معزبته مسويه خلاّصه الله لايهينه يفتح على البريد الخاص للعضو اللي حاب يودي له خلاّصه ويجيب المحقان على أسم العضو ويزل الخلاّصه وكلها بتحدر في البريد الخاص ..... بس ها ..... اللي بيدز لأحد يعلمه ، عشان لافتح بريده الخاص ماتملاه الخلاّصه وتغرق هدومه .

[بدر القلوب]

بسم الله الواحد الاحد
الفرد الصمد
بسم الله الرحمن الرحيم

والصلاة والسلام والسلام على النبي المصطفى محمد بن عبدالله خاتم النبيين والمرسلين


اول شي
لاهنت يالمحفوظي

بيض الله وجهك

يعطيك العافيه

ثانيا
انا ساناقشك باسلوبي الخاص وهو ان انتقادك عندما يكتب احد الاعضاء موضوع منقول وهو ينسبه الى نفسه فهذه تعتبر سرقه ويجب ان يفضح العضو بذلك وعندما ترى عضو ينقل دون ان ينوه الى انه منقول او ان ينوه الى الكاتب هو نفسه وانت تعلم انه ليس الكاتب فيجب عليك ان تواجهه وتقول اخي الكريم الكاتب فلان من الناس وهو كتب الموضوع في المنتدى الفلاني وبعد ذلك تاتي هنا مهمة المشرف في حذف الموضوع ومن ثم انذار العضو بان لايكتب مواضيع لغيره وينسبها الى نفسه
ولكن اعتقد بان الاعضاء جميعا يكتبووون في نهاية الموضوع منقووول اليس كذلك ؟

انتهت النقطه الاولى

ناتي للنقطه الثانية
الا وهي كثرة الردود وهذه حريه شخصيه فكما تعلم ان الاعضاء يتسابقون الى كثرة الردود فتجد كاتب الموضوع قد يخصص الردود في صفحه وقد يجعلها كل رد على حده وهذه حريه للكاتب نفسه ولا نريد ان نكون دكتاتوريين مع الاعضاء فهذا ابسط من حقوقهم في حريه الرد بالطريقة التي يرون فيها

الجزء الثاني من النقطه الثانيه وهي الردود لاهنت وبيض الله وجهك وعساك على القوه
فهذه كلها ردود مقبوله في جميع المواضيع ماعدا المواضيع السياسيه والمواضيع التي يكون فيها اختلاف لوجهات النظر والمنتدى يشهد بان هنالك ردود كثيره وفيها نقاش علمي كبير وفيها اختلاف لوجهات النظر

ولكن اخي الكريم
افرض مثلا انني نزلت موضوع جميل وهو يتكلم عن خاطره او موضوع والموضوع اعجبك جمله وتفصيلا هل ستناقشني في الموضوع وانت توافقه تماما ؟
ام انك سترد بالثناء علي بالموضوع الذي كتبته ؟

في النهايه بيض الله وجهك
وبيض الله قلبك بالايمان << هذي جديده :)
وسود الله عيون عذالك
والله يعز الاسلام والمسلمين ويعز حكوماتنا وينصر دينك ياشيخ << هذي جديده بعد :)

اخوك بدر القلوب :(


عزيزي المحفوظي اضغط هنا فموضوعك قد يكون مكرر :) (http://www.alajman.ws/vb/showthread.php?t=410)
تحياتي وسلام

[فهد بن محسن]

الاخ العزيز \ المحفوضي

حياك الله يالغالي .. وكلامك سليم وواقع في اكثر المنتديات .. ولكن الحقيقة في هذا المنتدى قد تكون بسيطة جدا مقارنة بغيره من المنتديات التي يزيد اعضاءها عن الآلاف .. والحقيقة الاعضاء يحاولون الرد والنقاش بقدر المستطاع .. وكل شخص على حسب علمه ومعرفته ,, واهميت الموضوع المطروح بالنسبه له ... يوجد مواضيع مهمه جدا لي ولك ولغيرنا ... ولكن لاتهم بعضنا .. او لا يبالي بالموضوع .. فالرد بيكون احتراما لشخصك ايه الكاتب فقط .. وتسجيل اعجابه بما تكتب او تنقل .. لا اكثر ولا اقل .. ولكن ان شا الله ان الرسالة قد وصلت ... وقد كتب في نفس هذا الموضوع الكثير من المواضيع ..

تحياتي لك

[طلااااااال]

المحفوظي.....اول شي حياك الله .......اما بخصوص الموضوع اللي طرحته (اعتبره تعدي على الحريات الشخصيه) مع احترامي لطرحك أخوي الكريم لكن بعض الاعضاء يمكن وانا اقول يمكن انه ماعنده البعد الفكري اللي يخليه يشارك في اي موضوع يطرح بحيث انه يقدر ينتقد او يشارك في الموضوع او يبدي وجهة نظره فتجده يكتفي (بشكرا لك....او لاهنت ....او أو لخ)وبالعكس مافيها اي شي ......ولا تنسى ان اكثر المواضيع اللي تطرح اكثرها للاستفاده فما نحتاج للتعقيب عليها او ابداء وجهة النظر او الانتقاد فنرد عليها (شكرا على الموضوع المفيد.....لاهنت على هالفكره.....الخ)......وشكرا.