من أروع القصائد الحماسيه

[مبارك المري]

هذي قصيده جميله جدا قيلت في (قدام)


وهي ان العجمان ارسلوا الشلايل ل ال مره



وشعر احد شعراء قبيلة ال مره هذه القصيده




السؤال ... من يفيدنا عن قائل هذه القصيده ؟؟؟؟



وحبيت انكم تقرونها لما فيها من الجمال والتصوير الرائع




ياراكب اللي مـن الدرهـام قفالـي =بالليل تسري وطول الصبح صلابـه




هجن ٍ الا من سعفها الصوت تجتالي =تشدي لشراد ريـم ٍ صاعـه ذيابـه




من فوقها من يبوج المشبر الخالـي =وان هابوا الناس عسر الدرب ماهابه




تنصى لنا اللي مع الطرشان وصالي =والموعد اللي طلب منا حضرنا بـه




سلم على اهل الوفا ذربين الافعالـي =اللي لكل الفخـر والطيـب كسابـه




اللابـة اللـي توطـي كـل عيالـي =واللي نزل في حماهم خـاب طلابـه




ربع ٍ لهم في سنام المجـد منزالـي =صعب ٍ على كـل رجـال ٍ تهقوابـه




عدوهم لاذكرهم فـي خـلا خالـي =من شدة الخوف نومه ماتهنـا بـه




صبيان يام ٍ حماة العرب الاجهالـي =كم طامع ٍ جا يبيها واخـذت ركابـه




المال دونه رجال ٍ ترخـص الغالـي =حامينها يـوم كـل ٍ رزقـه نهابـه




الا نصاهم ضعيف ٍ زملـه هزالـي =كنه بعالي جبـال طويـق وهضابـه




مطوعة راس من به زود وهبالـي =متبين ٍ بالخطـا والحـق عيـا بـه




اهل بيوت بهـا للضيـف مدهالـي =ومعـزبٍ يبهـج الخاطـر برحابـه




وان كدر البـال شـي ٍ ماتشافالـي =سليت سيف ٍ تنومس قضبة نصابـه




صوت ليام ٍ الا مـن حـدك الجالـي =وابشرك لارفعـت الصـوت بالثابـه




يام ٍ عمود الذرا في كـل الاحوالـي =والبيت لولا عموده طاحـت اقطابـه




غارٍ يـذري وتلقـى فيـه مقيالـي =وغار ٍ الا جيـت صوبـه ماتذرابـه




ماهي تذل الصعايب كـون برجالـي =وتصبر على الهون يمنى ٍ مالها لابه




كيف ادرك العز وانا فـرد والحالـي =مايدرك العز رجل ٍ قلـوا اصحابـه




ان ساعد الكف قوا الزند من عالـي =والا قصر شبرهـا عمـا تهقوابـه




جات الحمايا وسقنا الحال والمالـي =وسقنا المظاهير من يبرين وترابـه




ماعاد حن نستمع في كـل عذالـي =واللي تغيـب بعـد ماعـاد كنابـه




خيـل ٍ تنـازي بشيبـان ٍ وجهالـي =وحبل الرسن مايجود فيـه قضابـه




وضاع العقل من رجالٍ كان عقالـي =ومن الضجر كنهـم للخمـر شرابـه




لعيون غـر ٍ تهـل الدمـع زلالـي =ويقول (علي المرضف) مالي الابـه




تقدم الجمـع عـاد الفـي مامالـي =هذاك يوم ٍ على العدوان يدعى بـه




خذنا ثلاثين اصيل ٍ سوقهـا غالـي =من فوقها كل شغموم ٍ رمينـا بـه




لعيون سلمى هزمنـا كـل جمالـي =واقفى وخلا الحريم ونـارت كلابـه




حريمهم تنتخي مـن قلـة الوالـي =والمال همل وحنا اللي حظينـا بـه




الشيخ (ابن جمعه) لنا دز الارسالـي =من هجرة عريعره وصلتني ركابـه




يامرحبـا يـوم مرسولـه تعنالـي =والجيش جا_والشلايل_ جات برقابه




عيناك ياللي عيونه سهرهـا طالـي =من كان حن فزعته نومه تهنا بـه




سرنـا عليهـم بتكبيـر ٍ وهلالـي =والروس تحذف (وابن جمعه) يثارابه




شافي ٍ حدابه علينا القـادر الوالـي=طقه عقاب ٍ فـرا جوفـه بمخلابـه




يدور المنع حاديـه اشهـب اللالـي =مايدري ان كل صولتنا من اسبابـه




بالخنجر الحضرميه حطـه اوصالـيي =ليت اخـو فايـزه عينـه تحلابـه




وصيته اللي لبسوهـا ثوبهـا البالـي =لبّسوا حلايل عدانـا ماكسوهـا بـه




وصلاة ربي عـدد ماهـل همالـي =علـى نبـي ٍ هدانـا واهتدينـا بـه

[البدوي]

ابن عمي مبارك المري الله يطول عمرك ويعطيك الصحه والعافيه اشهد لله ان هذه القصيده قصيده جزله وقصيده ترفع روس يام كافه .

اخوى مبارك انا احصل لى موقف انا كنت مسافر من الكويت الى نجران ابي احضر زواج واحد عزيز من بنى عمى يام المهم جاء وقت صالة المغرب ونا اوقف في ذاك المكان ابي اصلي قبل السليل ويجينى صاحب ونيت رجال بنص عمره في الخمسينات ونصلي جماعه قضينى من الصلاه عرفنى على نفسه الرجال دوسري سألنى قال انت من وين قلت انا من يام وقف الرجل ونعم ونعم ونعم وقال لي كلمه والله انى ما نسيتها الى الان قال يا ولدي يام ( هي كل القبايل ) يام ياولدى وسبعين نعم يام ياولدى من نجران الى الخرج الى المنطقه الشرقيه الىقطر الى الكويت تلقى اليامي وجلس يقولي كلام والله انى احمد ربي انى منتسب الى يام من كثر ماحكى ها الشايب الدوسري قلت له يا والدى ما عليكم زود يا عيال زايد وانتم هل الكرم والشجاعه والطيبه استأذنت من الرجل على شان اتابع طريقي قال انت وين رايح قلت ياوالدى انا جاي من الكويت ورايح نجران عندي مناسبه ابي احضرها وبرجع الكويت قال والله يا عشاك انه عندي الليله المهم بعد شق الانفس انى اعتذرت منه لضيق وقتى . واخذ ينصحنى باني لا اسرع في الطريق وانى انتبه من الابل واخذ يدعو لي دعاوي تشرح الصدر وانا اودعه . الى احب اقوله سمعة قبيلة يام بجميع تفرعاتها بين القبايل ومكانتها الطيبه من غير نقص في باقي القبائل الاخرى .

الى جاب طاري السالفه القصيده الله لا يهينك على نقل القصيده والشاعر لازم نعرفه

ومشكور اخوي مره ثانيه وانا اسف للاطاله
اخوك / البدوي

[حبيب]

مباررررررررررررررك

اررررررررررررحب

ارررررررررررررحب

مرحبا يايام ياصلب جدي

صح السااااااانك ولاهنت على نقل القصيده

وانشالله يجي من الاخوا من يعرف القائل

[راكان اليامي]

ارررررحب يامبارك وصح لسان قايل القصيده وجعل يمناك ماتعطب يالقرم

ويالبدوي الدواسر ماعليهم زود رجال ينحطون على الجرح يبرى

[ابو فيصل الخويطري]

ارررررررررحب

لاهنت وبيض الله وجهك

وانشالله بيجينا القائل

منتظرين




الخويطري

[فهد بن محسن]

لاهنت يامبارك المري

وبيض الله وجهك على الاختيار الجميع

وصح الله لسان قايلها

تحياتي لك

[خشم العان]

لاهنت يامبارك

والعجمي والمري كل منهم للاخر في ذي ومثلها ولاهي بغريبة عليهم ال مرة ونعم

[محمد ال الضريره]

الاخ مبارك لاهنت على النقل

والقصيده اظن انها لعامر ابن نوطان ال جابر المري رحمه الله

[مبارك المري]

الله لا يهينكم على المرور العطر



ومشكور يا محمد ال ضريره على الخبر


اعتقد القصيده قبل عامر بن نوطان و الله اعلم


و عامر شاعر ولا هي غريبه عليه القصائد الحماسيه

[ابو منيف]

لا هنت يا مبارك ونعم في بني عمنا ال مره وش مصدر القصيدة ذي منين جبتها لانها ما هيب معروفه عند شيبان يام واذا تبغي القصائد اللي في قدام اذكرها لك ابشر بس هذي اول مره اشوفها ولا عندنا فيها خبر.

[ابو منيف]

واللي ارسل الشلايل الشيخ راكان بن حثلين وكان في الخرج والمرضف قريب منه في الدهناء والقصيدة تقول ابن جمعه وهذا ماهوب صحيح؟؟

[سعود الخويطري]

بيض الله وجهك يـ مبارك المري



صح الله لسانك والله يرحم شاعرها وجزلة ولاتجيب الا الجزالة


وكفو والله اني صادق فـ صبيان مرة ويام


تقبل سلامي واشواقي

الخويطري

[جرمان]

ضيف اللقاء الاستاذ/ فهد بن شلحاط يملي على مجري اللقاء فالح بن عمره روايات الشيخ عبد الله الدامر رحمه الله.


ص 47 تصحيح سنة 1260
(مناخ قدام)

قدام ضلع شرقا من حنيذ وتسمى هذه الوقعة بمناخ قدام وكان الدويش ومعه قوة من مطير ومعه الدهامشه من عنزه ومعه ناسا كثير حاسدينا هذا المحل الزين اللي حن نازلين فيه ويقولون ذا الجماعة اللي من اهل نجران ما ياكلون الجزور نزلوا في احسن مكان من ديرة بني خالد وقالوا هاذي ديرتنا وبلادنا فنوى الدويش بغزوهم ، فارسل لابن شافي وجاء بقبيلته وجاءه سبيع وتجمعوا وليس حب لبعض ولكن كراهية للعجمان والله سبحانه وتعالى نصرنا عليهم مشوا على العجمان وهم عند قدام وحاصروهم وكانوا العجمان برئاسة حزام بن مانع والفارس محمد الطويل وهو زمام الامر كله وكانوا العجمان قله وضايقوهم ولا عاد تعدت خيل العجمان بيوتهم وماوتوا وحفروا قبورهم عند اطناب بيوتهم والعدو اخذ يستدير بهم ، ثم ارسلوا العجمان لال مرة يستفزعون بهم ونوخوا على الامير/ علي المرضف وجاب ال مرة واللي معهم من كبارهم ومن ال مرة قسم ليس بكثير من العجمان ، ويوم اراد الله يفرج عليهم لذاك الخيال واصل من جنوب ينشد من محمد الطويل ويوم جاء عند الطويل قال ابشر بالمرضف قده ذا واصل قال الطويل يا هندي رح للمرضف وخله ينزل العرب ويقلط علينا للقهوة والعشاء راح هندي للمرضف وسلم عليه وقال الوالد يقلطكم للقهوة والعشاء وخل العرب ينزلون ، قال المرضف ذا الخيل المتوافقه غرب بيوتكم منهي له قال هندي هاذي خيل العدو قال اخو صبره ما عاد عينت لها خيل تردها رح لابيك وقله ترانا بنسلم عليهم قبل ما نسلم عليه رجع هندي لوالده واخبره قال الطويل فزع خيلنا معهم وركضوا عليهم وصاحوا عليهم صيحة لين قامت الخيل تطمر اطناب بيت الدويش ولاسندوا الا ومعهم خمسة وثلاثون قلاعه وعرضوا قدام بيت الطويل ونزلوا قال المرضف يا عيال روحوا نزلوا اهلكم وسنعوهم اما حنا يالشيبان قد حن بنتقهوى عند محمد الطويل وارجعوا علينا للعشاء ، وبعد ماركد الكلام والا واحدا يصوت يا علي يا علي المرضف قال من ذا قالت انا سلمى بنت محمد الطويل ويشهد الله وانت وابي اني مقدمت روحي لك جائزة على ذا المركاض لامن انتهى اللازم قال جعل ابيش في النار ما اكذبش ولا جابني عشقش غارتبيني للقتل وانا ما جبت الا ادور القتل والا اني جاي من الربع الخالي ما يخالط ابلي الا النعام والوضيحي والصيد ويوم علمت انش وبنات عمش تلوحون بشيالشن وتقولون يام يا سترنا يا علي يا سترنا فعفت الحياة وجيت ادور الموت والصبح على الطلاق ياذا العرب ان يقفون وراهم والا ما عاد تعينون الا قطع جوختي على روس الغضاء قالت تدرك العلم الغانم ولاهوب جاي الا الزين ويوم اصبحوا ركضوا عليهم والله نصرنا عليهم.
والا فيه رجل يلقب بعرفوب الشيخ من ال سليمان ولم يحضرني اسمه وهو اللي قتل محمد الدحام ذاك النهار وبعد الانتصار قال الشاعر عبلان هذه القصيدة

في قاعة قـدام مـن جنـوب
نوخنـا وحزمنـا العـضـاد
جانا باشـة البـدو الدويـش
مثل الغـوج منقطـع القيـاد
باع الروح بيـع المرخصيـن
وحطينا لـه الشقـراء وسـاد
وجانـا شافـي وابـو اثنيـن
كن جموعهـم كتـف الجـراد
وانا وربعي موطية النجـوس
الا منه نهـق عيـر الرشـاد
الا يـا الله يــارب كـريـم
جـزل المـد ياوالـي العبـاد
يـا رزاق خفـاق الجـنـاح
الا مسى ماذخـر لصبـح زاد
عبدا لك مطيـع مـا عصيـت
وما مشيت فـي درب الفسـاد
مـا تبعـت درب الغـاويـات
والمنقـود جنبـتـه عـمـاد
على ثر رسـول الله مشيـت
خليت النحى وامشـي سنـاد
الا يـا سعـد دنـوا اركـاب
عوص الجيش من سفن الحماد
كن عيونهـا غـب النفـوس
عيون البيض في حفل العيـاد
كن مرواحها خطو الوحـوش
تبي العشا من بعـد المصـاد
تنصـى لابتـي صبيـان يـام
ريف القلب لا جـاوك جـراد
هم كفوفنـا وحنـا العضـود
وهـم صوانـا وحنـا الزنـاد